ROXAS CITY —
Ginpanindugan ni Mayor Receliste Escolin sang banwa sang President Roxas, Capiz nga inosente ini sa akusasyon batuk sa iya sang anay bise alkalde sang banwa nga su Alfonso Golero may kaangtanan sa alegar salabton sang alkalde sa pagmando sini nga ipa-utod ang mga Indian Trees sa ila public plaza.
Sa counter affidavit ni Escolin nga ginsubmit sa Office of the Ombudsman bilang sabat sa ginpasaka nga reklamo ni Golero, ginpahayag sang alkalde nga maathag nga may lamud pamulitika ang tikang sang anay bise alkalde agud personal nga i-harass ang alkalde, samaron ang iya pangalan kag reputasyon bilang isa ka maayo nga opisyal.
Gin-athag ni Escolin nga wala niya ginpa-utod ang mga Indian Trees kag iban pa nga mga pananum sa plaza bangud ginpabasbasan lamang niya ang mga ini agud magtahum.
Apang wala sang nangin malain nga resulta sa palibot suno sa iya ang amo nga aksyon kag sa pagkamatuod, maayo pa ang pagtubo sang mga ini.
Suno pa sa iya nga indi sang iligal ang iya ginhimo bangud bilang alkalde sang banwa, sakop ini sang iya otoridad.
Gindugang pa ni Escolin nga wala sang balasehan kag indi sang patas ang ginapangabay ni Golero nga masuspendir siya bilang alkalde kag makasamad lamang ini sa iya pagkatawo.
