Nagsuhestyon si Representative Nathaniel Oducado nga tun-an liwat ang water flow sa probinsya sang Capiz bangud ang mga lugar nga sadto anay wala ginabaha, ang gulpi lang nga ginbaha sang Sabado, Oktubre 18.
Sa interview sang Bombo Radyo kay Representative Oducado sang 1-Tahanan Party-list, iya ginpahayag nga ang probinsya sang Capiz ang yara sa top 18 sa high risk provinces sa mga kalamidad kag trahedya sa bilog nga Pilipinas.
Suno kay Rep. Oducado, ang nagbubo nga ulan sang Sabado ang katumbas na sang isa ka bulan nga ulan kag lunsay rainfall ang na-eksperyensyahan bangud wala man nakabuya sang tubig sa dam.
Pahayag pa niya, tion na ini agud i-review ang disaster resilient capacity kasubong sang pagtsekyar sang waterflow,pagpatindog sang mga water resilient infrastructure, mapag-on nga flood control kag paghimo sang bag-o nga master plan bangud nagabag-o man ang lakat sang panahon.
Dugang pa sang natungdan, ang preparasyon ang kinahanglan nga mag-umpisa sa kaugalingon kag sa tagsa ka panimalay agud indi na maliwat ang kasubong sini nga kahalitan.
