ROXAS CITY – Liwat nga nagpatigayon sang clearing operation sa Burgos Talipapa, Burgos Street, Roxas City.
Ini ang ginpahayag sang pinuno sang Roxas City Environment and Sanitation Enforcement Team (RESET) nga si Ret. Col. Primo Golingay sang mainterview sang Bombo Radyo.
Nangin katuwang diri sang RESET ang City Engineer’s Office kag Traffic Management Unit (TMU).
Suno kay Golingay nga wala paman nila ginpapanaugan sang penalidad ang mga manugbaligya nga naga-upang sa dalan kag ila pa lamang ini nga ginpangsita.
Ginpahayag sini nga kinahanglan bakantehon sang mga manugbaligya ang mga kilid sang karsada bangud isa ini sa rason sang pagutok sang trapiko sa amo nga lugar.
Ginpahayag man ni Golingay nga magluwas sa Burgos Talipapa, hugot man sila nga magapatigayon sang clearing operation sa Teodoro Arcenas Trade Center (TATC).
