Nagpauli nga may yuhum kag kalipay ang kapin 286 ka pamilya gikan sa tatlo ka barangay sa banwa sang Pilar matapos makabaton sang libre nga tag-10 kilo nga bugas sa ginpatigayon nga distribusyon sa Brgy. Tabun-acan.
Ang mga benepisyaryo ginakalakipan sang mga pamilya nga sakop sang 4Ps, mga mangingisda, kag mangunguma nga naapektuhan sang padayon nga pagsaka sang presyo sang mga balaklon sa nagligad nga mga bulan.
Base sa rekord, 159 ka pamilya halin sa Brgy. Tabun-acan, 82 ka pamilya sa Brgy. Yating, kag 45 ka pamilya sa Brgy. San Silvestre ang nakabaton sang bugas.
Natigayon ang distribusyon pinaagi sa inisyatibo sang Gobyerno Probinsyal sang Capiz sa bulig sang Provincial Social Welfare and Development Office agud makahatag sang direkta nga suporta sa mga Capisnon nga nagakinahanglan.
Ginpahayag sang mga benepisyaryo ang ila pagpasalamat sa programa, nga nagahatag sang dugang nga bulig sa ila pang-adlaw-adlaw nga panginahanglan ilabi na sa tunga sang pagsaka sang presyo sang mga balaklon.
