ROXAS CITY – Nagapadayon ang road clearing operation sa tanan nga mga dalan indi lamang sa national highway kundi subong man sa mga kabarangayan sa primero distrito.
Ini matapos nga may ginpapanaog nga mandato si President Ferdinand Bongbong Marcos Jr., kun sa diin ginpaagi sa Department of Interior and Local Government (DILG) agud hatagan sang direktiba ang tanan nga mga Local Government Unit (LGU) nga magpatigayon sang road clearing operation sa mga dalanaon.
Sa interview sang Bombo Radyo kay Engineer Julius Abela, Chief sang Maintenance Division sang Department of Public Works and Highways DPWH) Capiz 1st Engineering District ginpahayag sini nga antes paman ang amu nga operasyon una na nga nagpatigayon sang public hearing may kaangtanan sa mga obstruction sa footwalk kun sa diin gilayon nga nag-isyu sang notice of violation sa mga nagabayular.
Suno kay Abela, bangud indi na masarangan sang mga opisyales sang barangay ang mga nagasuway sa amu nga pagsulundan naghinyo ang mga ini sang bulig agud mag-implementar sang full force ang nagkalain-lain nga mga ahensya kaangay sang Land Transportation Office (LTO), Highway Patrol Group, City Engineers Office, Department of Public Works and Highways (DPWH), Traffic Management Unit (TMU) katapo sang City Ordinances Regulations Enforcement Unit ( CORE) kag iban pa.
Matandaan nga una na nga nagpatigayon sang road clearing operation sanday Abela kaupod ang nasambit nga mga ahensya sa barangay Lawaan.
Tinutuyo sini nga operasyon agud kuhaon ang mga obstruction sa dalan ilabi na sa mga footwalk nga posible tunaan sang disgrasya sang mga umalagi.
