ROXAS CITY-Ginatun-an na sang Roxas City Inter-Agency Task Force on COVID-19 kun ano nga mga sanctions ang igapatuman batuk sa negosyante nga si Don Chiyuto kasunod sang pagpauli diri sa siyudad nga wala sang koordinasyon sa mga otoridad.
Sa interview sang Bombo Radyo kay CDRRM Officer Dennis Saneo ginpahayag sini nga may yara sang mga concern citizen nga nagreport sa talatapan sang City Disaster Risk Reduction and Management Office nga may yara sang eroplano nga nag-abot sa Roxas City Airport.
Gilayon naman nga ginpadulongan sang talatapan ang airport kun sa diin nakompirmar nga may yara sang nag-abot nga private plane kun sa diin sakay si Chiyuto.
Suno kay Saneo nga may yara ini sang ginpakita nga Letter of Acceptance gikan sa banwa sang Maayon rason nga gindala ini sa quarantine facility sang nasambit nga banwa.
Natukiban na lamang sa ulihi nga yara ini sa Barangay Cagay, rason nga ginkuha ini sang mga otoridad kag gindala sa puloy-an sang Pagpalangga Crisis Center apang makaligad sang pila ka mga oras ginbalik ini sa quarantine facility sang Maayon.
Apang, liwat naman nga nagbiya sa Quarantine Facility sa banwa sang Maayon si Chiyuto agud magpadulong sa ospital bangud ginapahayag nga naglain ang pamatyag sini matapos nga madugay nga naghulat sa airport.
Naglaum naman si Saneo nga pagkatapos sang pagpadulong sini sa ospital, magabalik ini sa banwa sang Maayon agud magpadayon sang quarantine apang ginkakibot sini sang nakalab-ot sa ila ang impormasyon nga nagbalik naman ini sa Barangay Cagay.
Gilayon naman nga nagpakig-angut si Saneo sa mga Barangay Officials sang Barangay Cagay agud mabantayan si Chiyuto.
Sa karon yara na sa talatapan sang Roxas City Legal Office ang kaso ni Chiyuto.
