ROXAS CITY – Ginapanan-aw sang pila ka mga Filipino kag mga pumuluyo sang Taiwan nga posible makitaan sang Chinese government sang inspirasyon nga sakupon ang Taiwan, ang nagakahinabo nga pagpangsakup sang Russia sa Ukraine.
Ini ang ginpahayag ni Bombo International Correspondent Dr. Reynand Fenolan Dumala-on, direkta sa Taiwan, sang mainterview sang Bombo Radyo.
Suno diri, indi malayo nga ilugon sang China ang ginhimo sang Russia bangud nahibaluan nga mag-abyan ang duha ka mga lider sang nasambit nga pungsod.
Matandaan nga madugay na nga may nagapatunga nga tensyon sa China kag Taiwan, sa pagkamatuod, sang nagligad nga tuig, makit-an ang pagpalupad sang mga helicopter sang China sa kahawaan nga sakup sang Taiwan.
Bangud sa Russia-Ukraine war, ginpahayag ni Dumala-on ginhugot pa sang Taiwan ang ila puwersa militar, agud preparasyon sa tion nga magasalakay ang China.
Nagapati si Dumala-on nga may ikasarang ang Taiwan pag-abot sa mga resources kag nagapanindugan ang ila presidente nga indi magpasakup sa China.
