Nahulog sa kanal ang awto sang tatlo ka mga kawatan sa isa ka convenience store samtang nagapalagyo sa General Santos City.
Bangod naipoit ang mga pertahan sang salakyan, kinahanglan nila gub-on ang windshield agod makagwa.
Base sa imbestigasyon sang kapulisan, ginaalegar nga nadulaan sang kontrol ang driver sang awto sa ila pagpalagyo, rason nga nagbunggo ini sa concrete barrier kag kahoy antes nahulog sa kanal.
Nahibaluan nga natalupangdan sang security guard sang tindahan nga pila ka items ang ginbutang sang mga kawatan sa bag. Apang sang lantawon na kuntani ang bag, nagdalagan sila pakadto sa salakyan.
Suno sa kapulisan, sang nagdali-dali ang driver nga kaupod sang mga kawatan, nadulaan ini sang kontrol tubtub nga nahulog sa kanal.
Nakapalagyo ang driver kag ang upod sini nga babaye sang ginwasak ang windshield sang salakyan. Ang ila isa pa ka kaupod sa trabaho nga naga-edad sang 20 anyos amo ang nadakpan.
Gindala sa presinto ang mga ini apang ginpahanugutan man ini nga makaguwa matapos nga nagdesisyon ang tagdumalahan sang tindahan nga indi na magpasaka sang kaso matapos ginbayaran sini ang kinawat nga mga produkto nga nagalab-ot sa P3,000.
Padayon man ang pagpangita sa driver sang salakyan nga posible magapangatubang sa reklamo nga reckless imprudence resulting in damage to property.
Ginapatihan man nga gin-arkilahan lang ang salakyan nga narehistro sa Cebu City kag sunog ang rehistro.
