Nag-file ang kampo ni Senador Jinggoy Estrada sang Motion for Reconsideration sa Sandiganbayan Fifth Division agud nga mapabaliskad ang desisyon sang korte nga nagdumili sa iya nga makapiyansa sa kaso nga plunder.
Una nga ginbasura sang Sandiganbayan sang Hulyo 24, 2026 ang iya mosyon, bangud suno sa korte, wala pa nagakaigo para magdesisyon sa piyansa.
Ginpaathag man sang korte nga ang plunder isa ka mabug-at nga kaso nga may posible nga silot nga reclusion perpetua, gani kinahanglan anay usisaon ang kabaskugon sang ebidensya antes magdesisyon kon pwede siya makapiyansa.
Sa bag-o nga mosyon, ginpahayag sang kampo ni Estrada nga wala siya sang posibilidad nga magpalagyo kay isa siya ka nagaserbi nga senador tubtob Hunyo 2028.
Ginahingyo subong ni Estrada ang Sandiganbayan nga usisaon liwat ang nauna nga desisyon kag tugutan siya nga makapiyansa.
Ang kaso batok sa iya may kaangtanan sa ginapangalegar nga P573 milyon nga kickbacks gikan sa mga proyekto sa flood control nga ginpasaka sang Office of the Ombudsman sang Mayo 28, 2026.
