Gin-postponed ang Senate Blue Ribbon Committee hearing nga natalana sa Abril 14, may kaangtanan sa ginaalegar maanomaliya nga flood control projects matapos wala nakasumite sang affidavit si Former Ilocos Governor Luis “Chavit” Singson kag bangud man sa kakulang sang pirma sa partial committee report.
Suno kay Senate President Pro Tempore kag Blue Ribbon Committee chairperson nga si Panfilo “Ping” Lacson, mahimo nga madayon ang hearing kon makasumite si Singson sang at least isa ka draft sang iya sworn statement kag kon may dugang pa nga lima ka pirma sa partial report agud nga mapresentar sa plenaryo.
Sa iya sulat kay Singson, ginpahayag ni Lacson nga dapat i-postpone ang hearing tubtob nga masumite ang affidavit upod ang supporting documents.
Ginpahayag man nga ginhatagan sang komite si Singson tubtob Abril 7, apang wala pa sang sabat.
Samtang, apat pa ka mga katapo sang komitiba ang nagpirma sa partial report, lima ang kulang sa kinahanglanon nga siyam ka pirma agud mapresentar ini sa Senado.
Sa pihak sini, ginpahayag ni Lacson nga ginakonsidera niya ang pag-file sang Chairman’s Report kag isumite ini sa Office of the Ombudsman, kaupod ang mga dokumento, transcript, kag ebidensya nga natipon gikan sa indi magnubo sa pito ka mga hearing agud makabulig sa nagapadayon nga imbestigasyon.
