Patay na sang nasapwan ang isa ka Senior Citizen, takna alas-7:00 kaina sang aga, Septyembre 10, sa sulod sang iya kaugalingon nga puloy-an sa Sitio Bulon, Barangay Bilao, Sapian, Capiz.
Ginkilala ang biktima nga si Dionila Obarra Doroteo, 71-anyos kag residente sang nasambit nga lugar.
Sandig sa nakuha nga impormasyon sang Bombo Radyo nagikan sa Sapian PNP, ginapahayag nga nakabaton sang tawag ang mga kapulisan kun sa diin suno kay certain Delia, utod sang biktima kag residente sang Barangay Cagay, Roxas City, nakit-an nalang sini ang biktima nga nagakaya kag wala na sang kabuhi kag puno sang dugo ang itsura sini.
Samtang, madasig naman nga ginrespondehan sang mga katapo kapulisan kag Scene of the Crime Operatives (SOCO) ang amu nga lugar.
Sa karon, yara na sa isa ka punerarya ang bangkay sang amo nga biktima samtang, nagapadayon sa gihapon ang imbestigasyon sang mga otoridad angut sa nasambit nga insidente.
