ROXAS CITY – Nagpadulong sa waragwagan sang Bombo Radyo Roxas ang isa ka 66-anyos nga tigulang agud magreklamo matapos nga ginkakas ang iya pangalan sa listahan sang mga Senior Citizens Pensioners nga makabaton sang pension sa banwa sang Pres. Roxas, Capiz.
Suno kay Nanay Shirley Villanueva sang Barangay Vizcaya nga nagpadulong ini sa Office of the Senior Citizen’s ukon OSCA agud kuntani magkuha sang pension sang nagligad nga pag-release apang ginkakibot sini nga wala na siya nalakip sa listahan sang mga makabaton.
Bangud diri, nagpangusisa ini sa presidente sang OSCA nga si Editha Belonio kun ngaa wala na ang iya pangalan sa mga senior citizens nga makabaton sang pension.
Apang, ginaalegar ni Villanueva nga kasubong gin-insulto pa ini ni Belonio rason nga ginkalain man sini sang iya nga buot matapos nga wala nalakip ang iya pangalan.
Ginapatihan sini nga posible ginpanas ang iya pangalan bangud ginbulos diri ang paryenti ni Belonio.
Bangud diri, ginpadulongan niya ang ila barangay apang wala man ini ginhatagan sang aksyon kag ginpanugyanan na lamang ini nga didto magreklamo sa DSWD-6.
Mahibaluan nga makapila ka beses na nga nagabaton si Villanueva sang pension apang sang tinalikdan nga pag-release lamang ini wala nakabaton matapos nga ginaalegar ginpanas ang iya pangalan.
