ROXAS CITY, CAPIZ- Tuman ka delikado ang epekto sang sigarilyo nga makuha sang tawo indi lama gang nagapanigarilyo kundi mismo ang makahaklo man sang aso.
Sa interview sang Bombo Radyo kay Doc. Cesar Yap Jr., Resident Doctor sang Bombo Radyo, kadungan sang pagselebrar subong nga adlaw, Mayo 31, 2025 sang World No Tobacco Day, ginpahayag nga kalabanan sa karon nga nagapanigarilyo amu ang mga pamatan-on nga kun sa diin nga amu ang madasig nga nagaka-enganyo kag ma-impluwensyahan sang pagpanigarilyo.
Dugang pa sini ang pagpanigarilyo indi lamang pamaagi sa paggamit sang tobacco cigarettes kundi pati na ang vape nga may yara sang pareho nga epekto sa lawas sang tawo.
Nahibaluan nga madamo sang mga chemicals ang sigarilyo nga mahimo makuha sang nagagamit, kaangay sang Ammonia kun sa diin ginagamit ini sa paglimpyo sang basin; Cyanide nga ginagamit sa pagpatay sa mga peste; Formaldehyde ukon Formaline nga ginagamit sa pagbalsamar; Acetylene nga ginagamit sa pag-welding kag 4,700 ka iban pa nga mga kemikal.
Mahimo naman nga makuha sang mga nagasigarilyo ang mga balatian nga kaangay sang; maguba ang baga, magka-cancer sa baga, heart attack, highblood, stroke, bad breath, erection problem para sa kalalakinhan, pagnubo sang libido ukon sexual energy, mabudlayan sa pagpangihi, cancer sa cevix kag osteoporosis para sa mga babaye.
Pahayag pa ni Doc. Yap, apisar nga mahal na ang presyo sang sigarilyo, nagapabilin sa gihapon nga madahog bangud sa ‘nicotine’ nga isa ka kemikal nga yara sa sigarilyo nga nagatuga sang adiksyon. Samtang, nagapanawagan si Doc. Yap sa mga nagapanigarilyo nga untaton na ini samtang timprano pa, para naman sa wala pa nagagamit, indi gid magpadala-dala sa mga nagapang-engganyo kag para sa iban pa, likawan nga maghaklo sang aso sang sigarilyo bangud nga mas delikado ang nagahaklo sang aso kaysa sa nagagamit.
