SIGMA, CAPIZ- Preparado na ang mga kapulisan sang Sigma Municipal Police Station para sa nagahilapit nga pagselebrar sang Hil-o-hanay Festival sa banwa sang Sigma, Capiz.
Sa interview sang Bombo Radyo kay Police Captain Mark Anthony Garcia, Hepe sang Sigma Municipal Police Station, ginpahayag nga may yara na sila gin-preparar nga communication letter para sa mga Punong barangay.
Tinutuyo sang nasambit nga communication letter ang pagrequest sang walo ka mga myembro sang Barangay Peacekeeping Action Teams (BPATs) ukon Task Force Multipliers nga magadugang sa pagbantay sa seguridad sang tagsa-tagsa sa tion sang amo nga selebrasyon.
Dugang pa sini nga magapahamtang man sila sang checkpoint magluwas sa regular checkpoint nga ila na ginapatigayon.
Nahibaluan nga iselebrar ang nasambit nga Hil-o-hanay Festival sa Sigma sa Hunyo 20 tubtob Hunyo 24, 2025.
Samtang, ginadumilian nga dal-on sa tion sang selebrasyon ang mga makamamatay nga butang.
Mensahe naman ni Garcia sa mga pumuluyo sang Sigma kag sa mga bisita, nga kuntani sundon sang mga ini ang mga patakaran nga ila ginapatuman agud malikawan ang kun ano nga sahi sang insidente ang posible nga magluntad sa tion mismo sang selebrasyon.
With a report from Bombo Francis Binas
