Ginbatak na ang Tropical Cyclone Wind Signal (TCWS) No. 3 sa naaminhan-nasidlangan nga bahin sang Babuyan Islands samtang nagbaskog ang Severe Tropical Storm Julian sa Philippine Sea sa nasidlangan sang Cagayan, suno sa state weather bureau subong nga Dominggo sang aga.
Bangud sini, lauman ang mabaskog nga hangin nga masobra sa 89 tubtob 117 km/h sa nasambit nga bahin sang Babuyan Islands sa sulod sang indi magnubo sa 18 oras.
Suno pa sa state weather bureau, ang TCWS No. 2, ang ginbatak sa Batanes, ang naaminhan-nasidlangan nga bahin sang mainland Cagayan (Santa Ana) kag sa nabilin nga bahin sang Babuyan Islands (Camiguin Is., Calayan Is., Dalupiri Is., Fuga Is.).
Ginalauman man ang hangin nga mas mataas sa 62 km/h tubtob 88 km/h sa sulod sang indi magnubo sa 24 oras.
Samtang, ang mga masunod nga lugar naman ang ginpaidalom sa TCWS No. 1 partikular sa:
Nabilin nga bahin sang Cagayan
Isabela
Apayao
Abra
Kalinga
Mountain Province
Ifugao
Ilocos Norte
Ilocos Sur
Northern portion sang Benguet (Bakun, Mankayan, Buguias)
Northern portion sang Aurora (Dilasag, Casiguran)
Mahimo nga makaeksperyensya ang mga ini sang hangin nga yara sa 39-61 km/h sa sulod sang indi magnubo sa 36 oras ukon lapta-lapta nga pag-inulan sa masunod nga 36 oras.
Una na nga gin-report nga alas-11 sang aga, ginpahayag sang state weather bureau nga ang sentro sang mata ni Julian ang ginabulubanta nga yara sa kalayuon nga 285 km nasidlangan sang Aparri, Cagayan.
Mahinay ini nga nagahulag sa naaminhan-nakatungdan nga may pinakamataas nga kabaskugon sang hangin nga 110 km/h malapit sa sentro kag may pagmadlos nga naglab-ot sa 135 km/h.
