Patay ang siyam ka mga monghe kag masobra 20 ang pilason matapos mabungguan sang isa ka pick-up truck nga ginamaneho sang gina-alegar 11-anyos nga bata sa Mukdahan Province sang Thailand.
Suno kay Bomo Rinse Galupo, International correspondent sa Thailand, iya ginpahayag nga kada aga nagalakat ang mga Buddhist monks sa kilid sang karsada bilang kabahin sang ila pilgrimage.
Ang mga biktima ang kabahin sang 34 ka Buddhist monks kag pila ka mga lay followers nga nagahalin sa isa ka templo sa Mukdahan Province pakadto sa Ubon Ratchathani Province.
Suno kay Galupo, ang insidente nagahatag sang leksyon sa mga ginikanan kag tag-iya sang salakyan nga dapat ginatago sang maayo ang yabi sang mga salakyan agud malikawan nga magamit ini sang mga kabataan.
Sa subong, ang 11-anyos nga bata nga nagmaneho sang pick-up truck ang yara sa state of shock kag wala pa makahatag sang pahayag sa mga awtoridad, samtang padayon ang imbestigasyon sa natabo nga aksidente.
