Wala sang nagakaigo nga sabat ang Punong Barangay sang Poblacion Sur, Sigma, Capiz sa ginapahayag paggamit sang Pondo sang SK Chairman sa ila Barangay bangud may kaugalingon man ini nga pondo kag opisina.
Sa Interview sang Bombo Radyo kay Punong Barangay Maria Shellane Palomar, ginpahayag sini nga bag-o paman nagguha ang balita una na nga nakighinun-anon ang ginikanan sang amo nga SK Chairman sa iya kag naghambal nga may problema ang ila nga bata.
Suno pa kay Palomar nga ginpatawag ini siya sa Munisipyo angut sa amo nga isyu.
Matapos sini, nagtambong man ang amo nga SK Chairman sa regular session sang barangay apang sa tion nga gin-istorya siya, blanko ini rason nga ginpa-iway lang sang council kag gin-advisan nga kun ano man ang matabo kinahanglan nga atubangon niya ini bangud nahibaluan niya man kun ano ang iya ginhimo.
Ginpahayag pa sang Punong Barangay nga bisan siya indi makapati sa ginhimo sang amo nga SK Chairman bangud sa pagkakilala sini mabuot ang amo nga Chairman kag wala ini sang malain nga record.
Dugang pa ni Palomar nga may posibilidad nga natintar ini rason nga naggamit niya ang kwarta. Sa subong, ginahulat naman ang desisyon sang SK Chairman kun igabalik ang amo nga kwarta.
