Naki-isa naman ang China sa nagapanawagan para sa pag-untat sang away sa tunga sang Israel kag Iran agud malikawan ang spillover sang giyera samtang nagapadayon ini.
Suno kay Guo Jiakun, tigpamaba sang Foreign Ministry, ginapangabay sang China ang mga partido nga apektado sa amo nga away nga likawan ang paglala sang sitwasyon, determinado nga malikawan ang spillover sang giyera, kag magbalik sa political resolution.
Ginhambal man sang China nga dapat maghimo sang paagi ang international community agud malikawan ang dako nga epekto sang giyera sa tunga sang Israel kag Iran sa ekonomiya sang kalibutan.
Ginpanginwala man sang China nga ang Persian Gulf kag ang mga kadagatan nga palibot sini amo ang mga importante nga ruta para sa kalakalan sang kalibutan.
Ginpahayag pa sang Chinese foreign ministry nga ang pagpabilin sang seguridad kag katatagan sa rehiyon ang isa ka common interest sang international community.
Ginhimo sang Chinese foreign minister ang pahayag pagkatapos nga ginpangabay ni US Secretary of State Marco Rubio ang China nga magbulig sa pagpugong sa Iran nga indi magsara sang Strait of Hormuz, isa ka importante nga ruta sang kalakalan matapos ang US nga maglunsyar sang strikes sa tatlo ka nuclear sites sang Iran.
