Kadungan sang ika-67 nga anibersaryo sang Social Security System nga may tema “SSS@67: Kabalikat ng Bagong Pilipinas”, nangin madinalag-on ang ginpatigayon nga SSS Pensioners’ Day sa syudad sang Roxas.
Sa pagpakig-angut sang Bombo Radyo kay Corporate Services Sector – Executive Vice President Elvira Alcantara-Resare, suno diri ang pagtipon kag libre nga paghatag nga mga serbisyo para sa mga pensioners ang pamaagi nga pagpasalamat sang ahensiya sa mga ini bangud sa paghimakas sang mga ini sa pagtrabaho kag paghatag sang ila nga kontribusyon indi lang sa ahensiya kundi mangin sa ekonomiya sang pungsod.
Ginlunsiyar man sang ahensiya ang #SSSKwentongPensyonado Campaign nga may tuyo nga mabatian ang istorya sang mga pensioners kun paano nabuligan ang mga ini sang SSS agud maganyat man ang iban nga mga indibidwal nga nagatrabaho na nga magtinguha magpaadayon sa paghulog sa ila kontribusyon bangud madamo ang mga benepisyo nga maagum sang mga ini.
Sa pensioners nga may luyag nga magpasakop, mahimo lang ini pinaagi sa pag-post sa Facebook kag didto i-describle lang kun paano ang mga ini nabuligan sang SSS Pension Loan Program.
Ang mechanics, indi dapat maglapaw sa 200 words, Filipino, English ukon kombinasyon sang mga ini kag ibutang sa ila nga post ang hashtags nga #SSS67thAnniversary kag #SSSKwentongPensyonado humalin Setyembre 6 tubtob 20, 2024.
Suno sa ahensya, magapili ang mga ini sang 11 ka mga entries sang ‘Kwentong Pensyonado’ nga igapasundayag sa Facebook page sang SSS sa Setyembre 30, 2024 kag ang grand winner ang magabaton sang papremyo nga nagabalor sang P67,000.
May ginpatigayon man nga mga diskusyon para sa mga pensioners nga nagapasanyog sang ikaayong-lawas sang senior citizens kag naghatag man ang mga ini sang pagsulundan sa paggamit sang SSS online platforms, ang My.SSS Portal kag SSS Mobile App para mga SSS transactions sang mga ini.
Naghatag man sang paathag ang ahensiya natuhoy sa Pension Loan Program (PLP) nga kun sa diin ang kwalipikado nga retirement pensioners ang sarang makahulam sang kapin P200,000 nga balor sang kwarta sa SSS.
