ROXAS CITY – Bastante ang suplay sang bugas sa probinsya sang Capiz apisar masami ginabahaan ang mga kaumahan sa nagkalain-lain nga mga kabarangayan.
Ini ang ginpahayag ni Mrs. Silvia Dela Cruz, staff sang Office of the Provincial Agriculture sang ma-interview sang Bombo Radyo.
Suno kay Dela Cruz, nagasuplay pa sang bugas ang probinsya sang Capiz sa iban nga probinsya apang wala naga-export sa luwas sang pungsod.
Dugang pa sini, nga yara lang sa average ang produksyon sang bugas ukon palay sa probinsya.
Ginpahayag man ni Dela Cruz, nga nagapakig-angut na sila sa Department of Agriculture agud maka-implementar sang national program.
Pag-abot naman sa assistance sang mga rice farmer, ila gina-implementar ang “The seeds support program” sa idalom sang rice competitiveness enhancement funds.
Ginklaro man sini sa mga mangunguma nga indi full ang ila mahatag nga bulig bangud isa lamang ini ka subsidy nga makapiyan-piyan sa kinahanglanon sang rice farmers agud mga maka-produce sang palay ukon bugas.
