ROXAS CITY – Padayon nga ‘unidentified’ ang suspek sa pagpangluthang sa Barangay Daan Banwa, Tapaz, Capiz.
Matandaan nga ginkilala ang napatay kay Janrick Jimenez Bluma, napilasan nga si Cjay Jimenez, 22-anyos kag isa pa nila ka upod nga masuwerte wala maigo nga si Melvin Salvana, 19-anyos lunsay mga soltero kag residente sang nasambit nga barangay.
Sandig sa inisyal nga imbestigasyon sang mga katapo sang Tapaz MPS, natabo ang insidente kagab-i sang Biyernes, Abril 22, sang naga-inom-inom ang magbarkada sa kilid sang feeder road, sang hinali nga nag-abot ang wala makilala nga suspek kag wala sang damo nga kumprontasyon, ginpaluthang sini ang mga biktima gamit ang ginaalegar .45 calibre nga armas-luthang.
Naigu sa ulo kag nagkalain-lain nga parte sang lawas si Janrick, samtang sa natuo nga paa ang kay Cjay.
Madasig man nga nagpalagyo ang suspek matapos ang insidente.
Gindeklarar nga dead on arrival sa pinakamalapit nga ospital si Janrick, samtang gin-refer nga i-transfer si Cjay sa Western Visayas Medical Center, sa Iloilo.
Nahibaluan nga sakay sa motorsiklo ang suspek sang nagpa-ulan sang bala.
Padayon sa karon ang madalum nga imbestigasyon, sa motibo sa nasambit nga krimen.
