ROXAS CITY – Ginpanginwala sang principal sang Maayon Elementary School nga nagpatigayon sila sang mini-graduation kun sa diin ginaalegar nga wala na-obserbar ang health protocols kapareho sang physical distancing.
Suno kay Dr. Evangelyn Dorado nga wala sang kamatuoran ang nasambit nga mga alegasyon bangud suno sa iya wala gid sang may natabo nga mini-graduation sa baylo nag-release lamang sila sang card sadtong Hunyo 12.
Kun may nagalapta man suno diri nga laragway sang mga kabataan nga naka-toga, ginklaro sini nga wala na siya sang kontrol kun ano pa ang ginhimo sang mga ginikanan matapos nakuha ang card sang iya mga kabataan.
Nagpanindugan ini nga nahangpan niya ang health protocols gani imposible nga ila ini nga lapason kag gintawag lamang niya nga ‘tsismis’ ang nasambit nga mga alegasyon.
Gintinguhaan man sang Bombo Radyo nga malab-ot ang adviser nga si Mary Joy Fabellon agud kuhaan sang paathag apang nagpamalibad ini nga magsabat bangud nakasumiter na ini sang explanation letter sa DepEd Capiz Schools Division.
Mahibaluan nga una na nga ginpahayag ni Department of Education (DepEd) Capiz Schools Division Superintendent Dr. Salvador Ochavo nga wala sang pahanugot gikan sa iya ang ginpatigayon nga mini-graduation sang nasambit nga buluthuan.
Suno kay Ochavo nga hugot nga ginadumilian ang face to face graduation sandig sa ginpaguwa nga memorandum sang DepED national office.
Ginkompirmar man ni Ochavo nga may yara sang salabton si Fabellon kag Dorado sa tion nga mapamatud-an nga naglapas sila sa ginpaguwa nga memorandum sang ahensiya.
Matandaan nga may nagpalab-ot sang reklamo sa Bombo Radyo natuhoy sa ginaalegar mini-graduation kag may mga laragway pa nga nagapamatuod kun sa diin makit-an nga wala natuman ang health protocols kapareho sang physical distancing.
