Nag-file sang ika-tatlo nga impeachment complaint ang religious groups, mga pari kag abogado batuk kay Vice President Sara Duterte bangud sa ginaalegar ‘betrayal of public trust’, ‘graft and corruption’, kag iban pa, bangud sa ginaalegar sala nga paggamit sang P612 million nga balor sang confidential funds.
Suno kay Atty. Amando Virgil Ligutan, counsel sang mga complainants, ang impeachment complaint ang nakabase sa findings sang House good government and public accountability committee may kaangtanan sa confidential fund nga gingamit sang Office of the Vice President (OVP) kag sang Department of Education sa idalom ni Duterte, ang pagpamahog sang bise presidente kay President Ferdinand Marcos Jr., kag ang akusasyon ni Ramil Madriaga nga ginaangot si Duterte sa drug money.
Ginpahayag naman ni Fr. Bong Sarabia, isa sa mga complainants, ang impeachment process amo ang pamaagi agud nga mapasabat ang bise president sa mga palamangkutanon sa kun paano sini gingasto ang pondo sang publiko, lakip na ang confidential funds.
Nahibaluan nga sang Pebrero 2, ang mga myembro sang Makabayan coalition kag allied groups ang nag-file sang una nga impeachment complaint batuk kay Duterte sang 2026 samtang ang ika-duha nga impeachment complaint ang gin-file sang civil society organization nga Tindig Pilipinas sa amo sa gihapon nga adlaw .
