Ginpaidalom sa operasyon ang 12 anyos nga bata nga lalaki agud makuha ang bala sa iya natuo nga tiil matapos matirohan sa Magsingal, Ilocos Sur.
Sa imbestigasyon sang kapulisan, nagahimo sang school assignment ang bata sang nag-abot ang 41 anyos sini nga tiyo kag ginaalegar hubog.
Ginpaguwa sang tiyo ang iya armas kag ginkakas ang mga bala.
Ginhampangan niya ang armas kag ginapitik, apang sa pangatlo kag pagpitik sini, naglupok ang armas bangud may yara pa gali sang nabilin nga bala nga wala niya nakakas.
Naigo ang tiil sang iya hinablos nga nagapungko lamang malapit sa iya.
Sa pagresponde sang mga pulis, matinlo na ang crime scene, apang gindakop sa gihapon ang suspek matapos gintudlo siya sang isa pa niya nga utod nga nakakita sa iya nga aksidente nga nakatiro sa iya hinablos.
Nakumpiska man ang armas kag nagguwa sa imbestigasyon nga ginprenda lamang ini sa iya.
Desidido naman ang pamilya sang bata nga magpasaka sang kaso sa suspek.
