ROXAS CITY -Padayon nga ginaobserbahan sa ospital ang kondisyon sang isa ka tiyo matapos nga ginaalegar ginpulihan ini buno sang duha niya ka gumangkon sa Sitio Pinaypayan, Barangay Lanot Roxas City.
Ginkilala ang biktima nga si Edgar Alatiit sang nasambit nga lugar.
Sa interview sang Bombo Radyo sa anak sang biktima nga si Aicel Alatiit ginaalegar sini nga tuyo kuntani sang biktima nga magpakig-istorya sa natabo nga kinagamo sa tunga sang iya utod kag mga suspek nga sanday Williamson Alatiit kag Wildam Alatiit.
Apang, wala ginalaoman nga hinali na lamang nga nagabot sang kutsilyo ang mga suspek kag ginbuno ang iya amay.
Nag-angkon naman sang pilas sa abaga, nawong kag kamot ang biktima nga gilayon naman gindala sa isa ka pribado nga ospital.
Wala na nakabato ang biktima bangud ginapahayag ginpulihan na ini sang mga suspek.
Daan nga hiligut-anon naman ang ginalantaw nga rason sa pagbuno sang mga suspek sa biktima.
Samtang, desidido naman nga magpasaka sang nagakaigo nga panumbungon ang pamilya sang biktima batuk sa mga suspek.
Sa karon, nagapabilin nga at-large ang mga suspek nga gilayon naman nagpalagyo matapos ang insidente.
