Arestado ang isa ka ginakabig nga top 2 most wanted person matapos nga ginserbihan sang warrant of arrest sang mga katapo sang kapulisan sa Burgos Ilawod, Bgry. IV, Roxas City.
Ginkilala ang suspek kay Alexander Adremisen, 48-anyos, isa ka laborer kag residente sang nasambit nga lugar.
Nagapangatubang ang amo nga suspetsado sa tatlo ka kaso nga paglapas sa Article II Section 5, Section 11 kag 12 sang RA 9165 ukon Comprehensive Dangerous Drugs Act of 2002.
Ang warrant of arrest ang ginpapanaog kag ginpermahan ni Hon. Faustino Valenzuela Roxas, Presiding Judge, Regional Trial Court, Branch 18, Roxas City nga napetsahan sadtong Agosto 29, 2024.
Wala sang ginrekomendar nga piyansa ang korte para sa temporaryo nga kahiwayan para sa isa ka kaso sini. Apang, gin-rekomendar naman ang 200,000 pesos nga piyansa para sa temporaryo sini nga kahiwayan para sa ika-duha nga kaso kag 40,000 pesos naman para sa ikatatlo nga kaso.
Sa karon, yara na sa kustodiya sang Roxas City PNP ang suspek para sa nagakaigo nga disposisyon.
