ROXAS CITY – Madamo sa guihapon sang traffic violators ang napagkit sang Capiz Police Provincial Office sa bilog nga probinsya sadtong tuig 2024.
Sa interview sang Bombo Radyo sa Police Information Officer sang Capiz Police Provincial Office, nga si PCPT. Merry Chris Dela Cruz, ginpahayag sini nga ini bangud sa mga motorista nga wala nagasunod sa ila ginapatuman nga mga layi.
Kalakip na diri amu ang mga driver nga nagabyahe apisar wala sang nagaka-igo nga lisensya kag mga dokumento kaangay sang OR (Official Receipt) kag CR (Certificate of Registration).
Suno kay PCPT. Dela Cruz, kung basehan ang nasambit nga datos sadtong 2024 kag 2023 wala sang kinalain kag halos palarehas lamang.
Bangud sini, nadesisyunan sang ahensya nga maga implementar sang CAPIZ VISA program agud madasig ma-identify ang mga motorista kung kumpleto ang mga ini sa dokumento samtang nagamaneho sang ila tagsa ka mga behikulo.
Samtang, padayon sa gihapon ang ila nga programa sa paghatag kag pagdul-ong sang mga impormasyon natuhoy sa traffic rules and regulations.
Mensahe sini sa tanan nga mga nagabyahe partikular ang mga nagamaneho, itsekyar ang dokumento kag magsunod sa mga ginapatuman nga layi pag-abot sa dalan agud malikawan nga mahatagan sang penalidad.
