ROXAS CITY – Pilason ang isa ka tricycle driver matapos ginbuno sang duha ka hold-up men nga naghold-up sa iya sa Sitio Caduolan, Barangay Banica, Roxas City.
Ginkilala ang biktima nga si Jay Maniapao sang Mckinley St., Barangay 1, Roxas City nga nag-angkon sang pilas sa kamot matapos nga ginhandus sang sang mga suspek.
Sa interview sang Bombo Radyo Roxas sa biktima, ginpahayag sini nga may gindul-ong ini nga pasahero sa nasambit nga lugar.
Nagapaguwa na ini sa lugar sang hinali nga may nagpara nga duha ka mga lalaki para magpasensilyo.
Pagpondo sang biktima nagdeklara sang hold-up ang isa sa duha ka mga lalaki.
Gilayon nga ginhatag sang driver ang sling bag sa diin nasulod ang P700 nga kita sini sa bulog nga adlaw nga biyahe, kasuno ang pag-apelar sa mga hold-upper nga indi ini pagsakiton.
Matapos nga mapasa sang isa sa mga suspek ang sling bag nga may uno nga kuwarta sa isa ka kaupod, ginbuno sang kutsilyo ang biktima nga napilasan sa kamot antes nagdalagan palayo sa lugar.
Samtang suno naman kay Maniapao nga makilala sini ang mga suspek, kun liwat nga makita ang mga ini.
Nakig-angut na sa mga pulis ang biktima pinaagi sa paglaragway sa mga suspek para indi na masulit ang paghold-up sa mga tricycle drivers.
