ROXAS CITY – Nagapabilin nga at-large ang security guard sang Capiz Sugar Central sa banwa sang President Roxas nga ginatudlo nagbuno sa isa ka tricycle driver sa isa ka binaylihan sa Barangay Cabug-Cabug, President Roxas, Capiz.
Nag-angkon sang pilas sa nawala nga likod ang biktima nga si Mark Araneta 24-anyos sang Barangay Vizcaya, President Roxas matapos nga ginbuno sang suspek nga si Bonifacio Mercado nga gilayon nagpalagyo matapos ang insedente.
Ginpahayag ni Police Captain Armando Clavaton, hepe sang President Roxas PNP nagaguwa sa imbestigasyon sang pulisya nga nagapungko ang biktima sa tricycle samtang nagatan-aw sang binayle sang hinali ginsumbag sang suspek kasunod ang pagbuno sa iya sa nawala nga likod.
Gilayon gindala sa Bailan District Hospital ang biktima agud madapatan sang nagakaigo nga pagbulong.
Samtang posible nga nakursunadahan lamang ang biktima bangud ba-se sa mga nakasaksi nga tuman ka hubog ang suspek nga si Mercado sang ginpalapitan ang nagatan-aw sa binayli nga biktima.
Sa karon gina-ayam na sang kapulisan ang suspek nga madasig nagpalagyo matapos ang insedente.
