Nagbalik kag nagpatigayon sang daku nga rally si anay United States President Donald Trump sa Butler, Pennsylvania nga amo man ang lugar kun sa diin nakaluwas siya sa isa ka tuyo nga asasinasyon sang Hulyo 2024.
Ang pagbalik sini sa amo nga lugar ang natabo man eksakto isa ka bulan antes ang November 5 presidential elections kun sa diin makasumpong sini si Vice President Kamala Harris.
Sang natabo ang assassination attempt tatlo ka bulan na ang nagligad, pabor sa former president ang dalagan sang eleksyon sa Amerika kun sa diin nangin matunog ang iya pangalan bilang “political martyr” kag nakaluwas sa kamatayon. Gindugangan pa ini sang pigado nga performance ni President Joe Biden sa debate nga sang amo nga tion amo ang presumptive nominee sang Democrats.
Halos isa ka semana matapos ang amo nga development, nagbalikad ang mga hitabo sa presidential race, nag-atras si Biden sa presidential race, kag nagbulos si Harris nga gintib-ong sang Democratic Party.
Kadungan sang pagbalik sang Trump campaign sa Pennsylvania, nagpadulong naman si Harris sa North Carolina agud makigkita sa emergency responders kag mga residente nga nabiktima ni Hurricane Helene.
Anum ka states ang nalaslasan ang hurricane kag yara sa 200 ang nagkalamatay.
