SIGMA, CAPIZ- Nangin madinalag-on ang una nga adlaw ( Hunyo 1, 2025) sang implementasyon sang Speed Limit para sa mga motorista sa banwa sang Sigma, probinsya sang Capiz.
Sa interview sang Bombo Radyo kay Ms. Riza Otayde, District Chief sang Land Transportation Office Dumalag District Office, ginpahayag nga nangin madinalag-on ang una nga adlaw sang Speed Limit sa amo nga banwa kun sa diin amo man ang pinakauna nga kahigayunan nga natabo sa bilog nga Western Visayas.
Dugang pa sini, ang Ordinance No. 05-S-2024 ukon “An Ordinance Setting the Speed Limit for all kinds of vehicles within the territorial jurisdiction of the Municipality of Sigma, Capiz and providing Penalties for the Violations Thereof” ang equipped sang mga high-technology equipments kasubong sang Speed Radar kun sa diin nga awtomatiko nga gina-capture sang camera ang nagalapas sa gintalana nga Speed limit.
Nahibaluan nga kadungan sang madinalag-on nga implementasyon sang amo nga ordinansa, natigayon man nga na-isyuhan sang Citation ticket ang 70 tanan ka mga drivers kag operators nga naglapas sa amu nga speed limit.
Sa pihak nga bahin, gin-athag ni Ms. Otayde nga wala sang may matabo nga pagkumpiskar sang Drivers’ License sa ila nga bahin apang mahimo lang ini nga pagkumpiskar sang mga deputized personnel sang Land Transportation Office (LTO).
Samtang, ginpatuman ang amo nga ordinansa agud mapahagan-hagan ang mga kaso sang insidente sa dalanon kun sa diin gindayaw naman ini sang LTO.
Ginapangabay naman ni Ms. Otayde nga mangin tayuyon ang amo nga programa sa amo nga banwa kag kuntani nga ilugon man sang iban pa nga mga kabanwahanan.
