ROXAS CITY – Nagapangasubo ang pamilya sang isa ka Capizeña OFW nga nagtrabaho sa Kuwait matapos makabaton sang balita nga ini ang napatay sa nasambit nga pungsod.
Sa exclusive interview sang Bombo Radyo Roxas kay Mr. Rogelio Maxian sang Barangay Agdahon, Cuartero, Capiz bana sang OFW nga si Jenelyn Pimentel Maxian, lima ka tuig na nga nagatrabaho ang asawa sa Kuwait, apang wala matapos ang kontrata kag nagTNT sa nasambit nga nga banwa bangud naglayas ini sa una nga employer nga nagmaltrato sa iya.
Matapos nahibaluan ni Mr. Maxian ang pagpanagi sang asawa labi ini nga nabalaka rason nga ginkumbinse sini si Jen nga magpauli na lamang sa Pilipinas.
Apang nagpanindugan ang OFW nga indi magpauli kag padayunon ang pagtrabaho sa pihak nga kalakip na ini sa mga undocumented OFW sa Kuwait, bangud luyag sini nga makatapos ang duha ka mga anak sa kolehiyo.
Nahibaluan nga nakapagpadala pa si Jen sang pera sa ila anak sang una nga mga tinuig sa Kuwait, apang samtang nagadugay kag nagapanago ini kun magtrabaho, wala na ini nakapadala sang kuwarta rason nga nagdesisyon si Mr. Maxian nga pauntaton sa pag-eskwela ang mga anak.
Katapusan nga naka-estorya ang iya asawa kag anak nga si Rey-R ginhambal na sang pinay OFW nga may balatian ini.
