MANILA – Nagsaka ang unemployment rate sa Pilipinas sadtong Marso, suno sa Philippine Statistics Authority.
Nagtaas ini sang 3.9 percent, nga mas mataas sa 3.8 percent sang Pebrero, sandig sa resulta sang ila nga Labor Force Survey.
Samtang, nagtaas man ang rate sang underemployment sa 13.4 percent sadtong Marso halin sa 10.1 percent sang Pebrero.
Ginpahayag ni PSA Undersecretary kag National Statistician Dennis Mapa nga nagtaas ang rate sang unemployment apisar nga ang kabug-usan nga numero sang mga wala sang trabaho sadtong Marso nagnubo sa 1.93 million ka indibidwal halin sa 1.94 million sadtong Pebrero. Ini bangud mas gamay ang mga nagsulod sa labor force sa amo nga bulan.
Pahayag sini, may 49.96 million nga Pilipino nga may edad 15 pataas nga lakip sa labor force, ukon ang mga may trabaho ukon wala sang trabaho. Ini ang nagnubo halin sa 51.09 million indibidwal sadtong Pebrero.
Suno kay Mapa nga mas madamo sang kabataan nga mamumugon ang mas mas ginpili nga magbalik sa eskwela kaysa magpangita sang trabaho.
Ginsambit pa sang PSA nga ang porsyento sang mga kabataan nga mamumugon sa labor force nagnubo sa 29.4 porsyento sadtong Marso halin sa 31.1 percent sang Pebrero.
Samtang, nagtaas ang underemployment rate bangud sa ginatawag sang PSA nga “invisible underemployed.” Ini ang nagatumod sa mga workers nga nagaubra sang 40 ka oras kada semana ukon masobra pa, apang nagapangita sa gihapon sang dugang nga oras sang trabaho ukon dugang nga trabaho.
Halin Pebrero tubtob Marso, ang mga sektor sang administratibo, edukasyon, manufacture, IT, mga hotel kag pagkaon ang nagdugang sang pinakamadamo nga trabaho, kun sa diin masobra 650,000 workers ang na-hire.
Sa pareho nga period, ang industriya sang konstruksyon nga nagapanguna nga ginasuguran sang pagdabong sang trabaho, ang nagbuhin sang pinakamadamo nga trabaho nga nagresulta sa pagkadula sang trabaho sang 473,000 workers.
