ROXAS CITY – Madugay na ginamonitor sang kapulisan ang hulag sang subject person nga nadakpan sa drug buybust operation sa Barangay Switch Tapaz, Capiz.
Sa interview sang Bombo Radyo kay PMaj. Jhon Almarino Bonior, OIC sang Tapaz Municipal Police Station, ginsiling sini nga antes pa man ini magpungko bilang OIC sang istasyon, maid-id na ini nga ginamonitor ang subject person nga si Rosie Gascon, kun sa diin namonitor ini nga nagabaligya sang ginaalegar iligal nga druga.
Nagaserbe naman bilang runner si Jerson Liaban, samtang Raymund Galagate kag Arnel Fabayos naman ang nagabakal sa kay Gascon.
Sandig man sa monitoring, nagakuha sang ginaalegar druga si Gascon sa probinsya sang Iloilo kag sa banwa sang Dumalag.
Matandaan nga nadakpan ang nasambit nga persona sa ginkasa nga buybust operation sang Capiz PPDEU, Tapaz kag Dumalag SDET kagab-I matapos nga nabaklan si Gascon sang ginaalegar shanu pinaagi sa pulis nga nagpakuno-kuno nga buyer.
Nakuha sa ila posesyon ang 10 tanan ka sachet sang ginaalegar druga kag ginabulubanta nga nagabug-at sa 10 ka gramo kag may market value nga P68,000.
Nagapanawagan naman si Bonior sa publiko, nga untaton na iligal nga buluhaton bangud wala ini sang matuga nga maayo kag magaguba lang sang buas-damlag.
