Gin-anunsyo ni President Donald Trump nga ginmandu niya sa mga federal agencies, kalakip ang Pentagon, nga umpisahan ang pagpagwa sang mga dokumento sang gobyerno natuhoy sa mga alien kag unidentified flying objects (UFO) bangud sa mataas nga interes sang publiko.
Sa isa ka post sa social media, gintawag ni Trump ang isyu bilang “extremely interesting and important.”
Una diri, gin-akusaran niya si anay President Barack Obama nga kaangay wala nagbuyagyag sang tanan nga classified information natuhoy sa mga alien, nga gintawag niya nga “big mistake.”
Sa pihak nga bahin, ginsiling ni Obama sa isa ka podcast kag sa Instagram nga matu-od ang posibilidad sang extraterrestrial life apang wala siya sang nakita nga ebidensiya sang pakig-koordinar sang mga alien sa Earth. Suno sa iya, ang Area 51 sa Nevada ang isa ka testing site para sa top-secret spy planes kag wala sang ebidensiya nga may underground alien facilities.
Ginsiling ni Trump nga wala man siya sang nakita nga konkreto nga ebidensiya sang mga alien kag gin-ako nga indi niya nahibaluan nga kun matu-od ang mga ini ukon indi.
