Gin-anunsyo ni US President Donald Trump ang pagtukod sang isa ka “Board of Peace” para sa Gaza, nga nagatuyo sa pagdumala sang interim leadership kag rekonstruksyon sang mga naguba nga lugar pagkatapos sang giyera sa tunga sang Israel kag Hamas.
Ang mga founding member’s sini nagalakip sanday US Secretary of State Marco Rubio kag Former UK Prime Minister Sir Tony Blair. Ang executive board nagalakip man sang Middle East envoy nga sanday Steve Witkoff, Jared Kushner, World Bank President Ajay Banga, Marc Rowan, kag US national security adviser nga si Robert Gabriel samtang si Trump ang magaserbe bilang chairman sang board.
Samtang, si UN Middle East envoy Nickolay Mladenov gin-appoint man bilang tiglawas sang board mismo sa Gaza.
Ini nga grupo kabahin sang 20-points nga plano ni Trump sa kalinungan.
Dugang pa, isa ka International Stabilization Force ang pagatukuron nga pagapangunahan ni US Major General Jasper Jeffers agud suportahan ang seguridad kag hanason ang Palestinian police.
Sa amo man nga tion, ang separado nga National Committee for the Administration of Gaza pagatukuron, isa ka 15 member sang Palestinian technocratic body nga ginapangunahan ni Ali Shaath, pagatukuron sa pagdumala sang adlaw-adlaw nga mga operasyon sa teritoryo.
Matandaan nga ang US peace plan ginpatuman sadtong Oktubre sang nagligad nga tuig kag yara na sa ikaduha nga hugna sini, nga nagatutok sa rekonstruksyon kag demilitarization sang Gaza, lakip na ang pagdisarma sang Hamas.
Apang, ang kasugtanan nagapabilin nga mahuyang samtang ang kasingki padayon nga narekord, kag suno sa United Nations, ang kahimtangan sang kapin sa 2.1 milyon ka mga Palestinian sa Gaza nagapabilin nga makahalanusbo.
