Ginhingyo ni US President Donald Trump ang Hamas nga batunon ang “final proposal” para sa 60-day ceasefire sa Gaza, kasunod sang pag-ugyon sang Israel sa mga termino sang kasugtanan.
Sa isa ka post sa social media, ginpahayag ni Trump nga ang tanyag igahatag sang mga tiglawas gikan sa Qatar kag Egypt.
Suno sa iya, indi ini mag-ayo — magalala ini, samtang nagapanawagan nga gamiton ini nga kahigayunan sa pagtapos sang inaway.Suno kay Trump, katuyuan sang temporaryo nga ceasefire amo ang pagsugod sang istoryahanay para sa lubos nga pagtapos sang inaway, kag ang paghilway sang mga bihag kabaylo sang mga bilanggo nga Palestinian kag mga bilin sang mga patay nga militante nga Palestinian.
Natalana sia nga makigkita sa Israeli Prime Minister Benjamin Netanyahu sa Lunes sa White House agud dugang nga istoryahan ang kasugtanan.
Ang inaway nagluntad sang Oktubre 7, 2023, pagkatapos nga ginlunsar sang Hamas ang pag-atake sa Israel, nga nagresulta sa 1,200 ka mga Indibwal ang napatay kag 251 ka mga bihag.
Nagpamalibad ang Hamas nga magdisarma, samtang nagapanindugan ang Israel nga ini ang panguna nga kondisyon sa pagtapos sang opensiba.
Suno sa Gaza health ministry, masobra 56,000 ka mga Palestinian ang napatay sa opensiba sang Israel.
Naglala man ang krisis sa pagkaon kag ang pilit nga pagbakwit sang mga sibilyan.
Padayon nga ginapanghiwala sang Israel ang mga akusasyon sang genocide kag krimen sa amo nga inaway.
