ROXAS CITY — Estable ang sitwasyon sa Visayas kag wala sang na-monitor nga anuman nga aktibidad ukon presensiya sang mga terorista.
Ini ang ginpasiguro ni Major General Jon Aying, commanding general sang 3rd Infantry Division sang Philippine Army, agud dulaon ang pagkabalaka sang publiko nga posible makalab-ot sa Visayas ang Maute Group.
Suno sa opisyal nga padayun sa karon ang ginapatuman nga preventive measure sang militar agud masiguro ang seguridad sang mga pumuluyo.
Ginabantayan man sang militar ang posibilidad nga maglab-ot sa Visayas ang Maute Group kun malutos sila sang tropa sang gobyerno sa Marawi City.
Nagapati man ang opisyal nga luyag lamang pabaskugon ni Duterte ang paghulag sang militar kag pulisya sa iya pahayag nga mahimo masakop pa sang Martial Law ang Visayas agud madasig nga makaaksyon ang otoridad sa mga pamahog sa seguridad sa rehiyon.
