Nagpahayag sang kahadlok si Vice President Sara Duterte para sa iya kag iya mga kabataan samtang nag-atubang siya sa legal nga proseso may kaangtanan sa warrant of arrest nga ginpagwa sang Quezon City Regional Trial Court (QC RTC).
Sa iya statement nga ginpaguwa subong Setyembre 5, 2026, ginpahayag ni Duterte nga dokumentado na niya ang mga pamahog kag harassment nga iya gin-alegar nag-umpisa pa sang 2023.
Suno sa iya, nahadlok siya para sa iya mga kabataan kag indi niya mabatyagan nga safe sila kun yara siya upod sa ila.
Ginpahayag man sang Bise Presidente nga nagkadto na siya sa korte kaupod ang iya mga kabataan, apang apisar amo sina, nagkadto sa gihapon ang pulis.
Iya man ginpahayag nga wala siya nakabatyag sang seguridad kag nabalaka pa nga posible siya patyon.
Ini nga pahayag ni Duterte nagaguwa samtang yara siya sa sentro sang legal nga atensyon matapos magpagwa ang QC RTC Branch 98 sang warrant of arrest batok sa iya bangud sa tatlo ka kaso sang grave threats.
Nakita man ang dugang nga deployment sang mga pulis sa Quezon City Hall of Justice matapos ginpagwa ang warrant.
Ang kaso nag-ugat sa iya online press briefing sang Nobyembre 2024, diin ginpahayag niya nga may yara siya gin-istorya nga tawo nga iya ginmanduan nga patyon si President Ferdinand Marcos Jr., First Lady Liza Araneta-Marcos kag anay House Speaker Martin Romualdez kun may matabo sa iya.
Nakita sang QC RTC nga may probable cause para ipadayon ang kaso kag magaatubang si Duterte sang trial.
Ang piyansa naman ang yara sa P120,000 para sa kada isa sa tatlo ka kaso.
Una na nga ginpahayag sang abogado ni Duterte nga wala sang intensyon ang Bise Presidente nga magpalagyo sa proseso kag ipadayon niya ang iya mga legal remedies.
