Ginpanindugan sang testigo sang prosecution nga may salabton si Vice President Sara Duterte kag duha ka iban pa nga mga opisyal sang Office of the Vice President bangud sa disbursement sang P73 million gikan sa P125 million confidential funds nga gin-disallow sang Commission on Audit (COA).
Nag-tubang si state auditor Xylene del Campo bilang testigo sang prosecution sa ika-14 nga adlaw sang impeachment trial ni Vice President Duterte.
Si Del Campo nagtrabaho sa COA Intelligence and Confidential Funds Audit Office kag nagtestigo nahanungod sa Notice of Disallowance nga gin-isyu sang COA batok sa 2022 confidential fund sang OVP.
Suno kay Del Campo, wala sang mga resibo para sa mga gingasto nga pondo, gani ginakabig nga may salabton sanday Vice President Duterte bilang head sang ahensya, special disbursing officer Gina Acosta, kag chief accountant Julieta Villadelrey.
Ginpahayag man ni Del Campo nga gin-liquidate sang OVP ang P125 million nga confidential fund pinaagi sa pagpasa sang mga dokumento para sa mga gingasto halin Disyembre 13 tubtob 18, 2022, antes pa nila nabaton ang confidential fund sang Disyembre 21.
Lakip sa mga aktibidad nga ginpakita sa mga dokumento amo ang youth patriotism campaign, Christmas parties and activities, kag thanksgiving gathering, apang pahayag ni Del Campo, indi ini sakop sang Joint Circular 2015-01 nga nagamando sa paggamit sang confidential kag intelligence funds, gani indi ini mahimo gamiton sa pag-liquidate sang P125 million nga pondo.
