Posible nga manabat si Vice President Sara Duterte sa mga paglapas sa Anti-Terrorism Act, ang isa sa mga layi nga ginpermahan sang iya amay nga si anay Presidente Rodrigo Roa Duterte sang 2020 bangud sang pagpamahog sini sa kabuhi nanday Presidente Ferdinand “Bongbong” R. Marcos Jr., First Lady Liza Araneta-Marcos, kag Speaker Ferdinand Martin G. Romualdez.
Ang pagpamahog ni VP Sara ang ginaimbestigahan na sang National Bureau of Investigation (NBI) kag isa sa posible nga kaso nga pagaatubangon sini amo ang Anti-Terrorism Act.
Ginbatikos man ni House Assistant Majority Leader at Zambales Rep. Jay Khonghun ang mga nangin pahayag ni Duterte nga ang ginatuyo sang mga tikang sang otoridad amo i-freeze ang iya mga propedad kag isubong ini sa gindangat ni anay Negros Oriental Rep. Arnolfo Teves Jr. nga gintawag sini nga “Arnie Teves playbook.
Ginpunto ni Khonghun nga ang mga natabo kay Duterte ang bunga sang iya nga mga ginhimo kag indi sang gobyerno.
Gin-akusahan ni Duterte nga indi na bag-o ang mga istilo agud i-freeze ang iya nga mga propedad nga kasubong sang mga taktika nga gingamit batuk kay anay Negros Oriental Rep. Arnolfo “Arnie” Teves Jr., nga gin-kasuhan sang terorismo, nga ginapahayag nga parte sang isa ka “malaking plano” batuk sa iya.
Ginsabat man nila House Deputy Majority Leader kag La Union Rep. Paolo Ortega V ang pahayag ni Duterte, nga nagapahayag nga ini lamang sya ang dapat basulon sa iya mga aksyon.
Gintalupangod sini ang kabug-aton sang ginapahayag nga pagpamahog ni Duterte batuk sa mga mataas nga opisyal, kalakip na si Presidente Marcos.
Nagsugod na ang NBI sang imbestigasyon tuhoy sa mga pahayag ni Duterte, sa posible nga paglapas sini sa Anti-Terrorism Act.
Ginausisa sang ahensya kun ang mga pahayag sini ang makabig nga grave threats.
Ginpunto ni Khonghun ang importansya sang tama nga proseso, kag ginsiling nga ang mga ahensya kasubong sang Department of Justice (DOJ) kag NBI ang dapat maghiwat sang masusi nga imbestigasyon sa mga aksyon sang Bise Presidente.
Ginpunto sini nga kun may yara nga matumod nga paglapas, dapat lamang nga maghiwat sang legal action.
Ang mga pahayag sang mga mamalidha ang kasunod sang mga nagapadayon nga imbestigasyon tuhoy sa mga sala nga paggamit ni Duterte sang mga confidential funds nga may kabug-usan nga balor nga P612.5 milyon kag mga pamahog batuk sa mga mataas nga opisyal sang gobyerno.
