ROXAS CITY -Ginkompirmar sang pamunuan sang Provincial Disaster Risk Reduction and Management Office ukon PDRRMO nga wala sang may nagpositibo nga Locally Stranded Individuals ukon LSI sa Real-Time Polymerase Chain Reaction ukon RT-PCR test nga nakapauli sa probinisiya.
Ini ang ginpahayag PDRRMO Head Judy Grace Pelaez sang mainterview sang Bombo Radyo.
Ginpahayag ni Pelaez nga wala sang may nagpositibo sa RT-PCR test sa kapin 3,887 ka mga LSIs nga nakapauli sa probinsiya apang may yara sang mga nag-positibo sa rapid test.
Ginpasiguro ni Pelaez nga hugot nga ginapatuman ang mga health protocols sa nagapauli nga mga LSI’s.
Suno kay Pelaez nga ila ginapasiguro nga napaidalum sa rapid test ang tanan nga mga LSI’s antes sila paghanugutan nga magpauli sa tagsa ka mga kabanwahanan samtang ang mga LSI’s nga nag-agi sa iban nga mga entry points sa isla sang Panay ang ginapaidalum man sa rapid testing.
Gindugang pa sini nga ginapaidalum sa gihapon sa 14-day quarantine period ang isa ka LSI sa pihak nga nag-negatibo na ini sa rapid test.
Samtang ginkompirmar man ni Pelaez ang temporaryo nga pagpaiway sang mga sweeper flights kag mga mercy voyage sakay ang mga LSI’s sa sulod sang duha ka semana.
Kasunod ini sang padayon nga pagsaka sang numero sang mga LSI’s nga nagpositibo sa COVID-19 sa pungsod.
Apang ginpasalig ni Pelaez nga magapadala sang sulat si Capiz Governor Esteban Evan Nonoy Contreras agud mag-apelar sa National Inter-Agency Task Force.
