Nagpanawagan ang World Health Organization kag UNICEF sang pito ka adlaw nga tigil putukan sa Gaza, matapos makumpirmar sang Palestinian health ministry ang pinakauna nga kaso sang polio.
Base sa ginpadala nga sample test sa Amman, Jordan nga nagikan sa Gaza, nahibaluan nga type 2 poliovirus sa wastewater ang nadiskubre sa mga dalagko nga siyudad sang Gaza.
Suno naman sa impormasyon nga ginhatag sang Palestinian health ministry nga ang una nga kaso amo ang nagdapo sa 10 bulan ka tuig nga lapsag sa may Deir al-Balah.
Wala nakabaton sang bisan ano nga vaccination ang lapsag rason agud nga nag-angkon ini sang infectious disease.
Hugot nga nagapanawagan ang WHO nga mag-ceasefire na sa Gaza agud maayos ang pito ka adlaw nga paghatag sang vaccination sa 640,000 Palestinian nga bata nga may edad 10-anyos pataas.
Nahibaluan, 95% na nga mga bata ang kinahanglan mabakunahan agud indi na maglapta ang polio kag mabuhinan ang risgo sini.
Ang vaccination campaign sang WHO ang may two rounds nga pagahiwton sa Setyembre kag pagahatagan ang mga bata humalin 10 ka tuig panubo sang two drops sang oral vaccine batuk sa type 2 polio virus.
