Magaserbe nga target sang maritime strikes ang decommissioned World War II nga warship sang Philippine Navy sa nagapadayon nga tuigan nga Balikatan exercise.
Sa isa ka pahayag, ginpahayag sang Armed Forces of the Philippines (AFP) nga ang anay BRP Miguel Malvar ang pagapuntiryahon sang mga assets gikan sa Philippine Air Force, US Air Force, US Marine Corps kag Australian Defense Force nga magapaguwa sang nagkalain-lain nga ordinance.
Ang Miguel Malvar gintukod sang 1944 bilang USS Brattleboro kag sang ulihi ginsugo sang Philippine Navy bilang isa ka corvette, ang ini nga barko de guerra gin-decommission ukon ginkuha sa serbisyo gikan sa Philippine Navy sang 2021, isa sa katapusan nga mga barko de guerra sang panahon sang WWII.
Sa mga nagligad nga iteration sang Balikatan, ginpatigayon man ang paghanas sa paglunod sang mga decommissioned ships kaangay sang BRP Pangasinan sang 2023 nga ginlugdang matapos nga ang daan nga corvette naigo sang ginhulog nga mga bomba kag artillery rounds sa disputed waters.
Sang nagligad nga tuig, gingamit bilang target ang anay BRP Lake Caliraya nga isa ka Chinese-built tanker.
