Nagdangat na sa 10 katawo ang napatay nga mga Syrian national sa ginlunsyar nga strike sang Israel sa isa ka residential building sa Nabatieh city sa southern Lebanon sining Sabado suno sa Lebanese health ministry.
Kalakip sa mga napatay ang isa ka babayi kaupod ang iya 2 ka anak samtang pilason ang 5 ka iban pa kun sa diin 2 ang yara sa kritikal nga kahimtangan.
Suno naman sa Israeli military, ginkumpirma nila nga gin-igo sang ila air force ang weapons storage facility sang Hezbollah sa may Nabatieh, 12 ka kilometers nagikan sa Israeli border.
Matandaan nga naglala pa ang tensiyon sa rehiyon sa mga nakaligad nga adlaw matapos ang makahalalit nga rocket strike sa okupado sang Israel nga Golan Heights nga ginbasol sa Lebanese militant group nga Hezbollah.
Ginhatagan pagtamud naman ini sang Israel sang strike nga ginkapatay sang top Hezbollah commander nga si Fuad Shukr sa Beirut.
