ROXAS CITY – Padayon nga ginabulong sa ospital ang napulo ka tuig nga bata matapos aksidente nga natiruhan sang kahampang sa Barangay Basiao, Ivisan Capiz.
Nag-angkon sang pilas sa nawong nga naglapus sa abaga ni alyas Noy ang bala nga gikan sa kalibre 22 nga revolver.
Sa interview sang Bombo Radyo Roxas kay Police Staff Sergeant Emilio Ubalubao sang Ivisan PNP, ginpahayag sini nga nagaguwa sa imbestigasyon nga nagahampang ang biktima kag ang kahampang nga onse anyos nga bata sang makita ang pusil.
Sa pagdumdum nga hampanganan lamang ang pusil, gingamit ini sang mga bata sa ila nga paghampang apang nakibot sang nabatian nga naglupok ini.
Gilayon nga gindala sa ospital si alyas Noy samtang yara sa kostodiya sang Women and Children Protection Desk (WCPD) sang Ivisan PNP ang 11-anyos na menor de edad.
