Ginbatak sang PAGASA ang Tropical Cyclone Wind Signal (TCWS) No. 1 sa 14 ka lugar sa Luzon samtang ginalauman nga ma-landfall sa kadutaan sang Cagayan ang Tropical Depression Crising sa Biyernes ukon Sabado.
Sa ginpaguwa nga 11 a.m. weather bulletin sang state weather bureau subong nga Huwebes, ginpahayag sang PAGASA nga yara sa kalayuon nga 520 kilometros nasidlangan naaminhan-nasidlangan sang Juban, Sorsogon, ukon 470 kilometros nasidlangan naaminhan-nasidlangan sang Virac, Catanduanes ang bagyo.
Dala sini ang kabaskugon sang hangin nga nagalab-ot sa 55 km/h malapit sa sentro kag may pagmadlos sang hangin nga tubtob 70 km/h. Nagahulag ini pa-aminhan naaminhan-nakatungdan sa kadasigon nga 25 km/h.
Yari ang mga lugar nga yara sa idalom sang Signal No. 1:
– Nabagatnan nga bahin sang Batanes (Sabtang, Ivana, Uyugan, Mahatao, Basco)
– Cagayan kalakip ang Babuyan Islands
– Isabela
– Quirino
– Naaminhan-nasidlangan nga bahin sang Nueva Vizcaya (Kasibu, Quezon, Bagabag, Diadi, Bayombong, Solano, Ambaguio, Villaverde)
– Naaminhan nga bahin sang Aurora (Dilasag, Casiguran, Dinalungan, Dipaculao)
– Apayao
– Abra
– Kalinga
– Mountain Province
– Ifugao
– Ilocos Norte
– Naaminhan nga bahin sang Ilocos Sur (City of Vigan, Santa, Caoayan, Bantay, Nagbukel, Narvacan, Cabugao, San Juan, Sinait, Magsingal, San Ildefonso, Santo Domingo, San Vicente, Santa Catalina)
– Naaminhan kag nasidlangan nga bahin sang Catanduanes (Pandan, Bagamanoc, Panganiban, Viga, Gigmoto)
Suno pa sa PAGASA, may posibilidad nga magbhaskog pa si Crising kag mangin isa ka tropical storm antes ini mag-landfall.
Ginapanugyanan ang mga residente sa mga apektado nga lugar nga magpreparar sa posible nga pagbaha kag pagtuphag sang duta, ilabi na sa mga manubo nga lugar kag malapit sa kabukiran.
Padayon man ang monitoring sang PAGASA sa posible nga pagbag-o sang direksyon kag kabaskugon sang bagyo.
