Ginsiguro sang gobyerno sang Israel nga luwas kag ginaatipan ang 17 ka mga Pilipino trainee kag apat nga eksperto nagikan sa Department of Agriculture nga yara sa pungsod para sa agricultural training.
Suno kay Israeli Ambassador Ilan Fluss, ginasuportahan ang ila sini nga pagkaon, puluy-an, kag iban pa nga mga kinahanglanon.
Ang nasambit nga training nag-umpisa sang Hunyo 10 kag ginalauman nga matapos kuntani sa Hunyo 20, apang naapektuhan sang nagalala nga tensyon sa rehiyon kag pagsirado sang airspace kun sa diin nga na-delay ang ila sini nga pagbalik sa Pilipinas.
Dugang diri, nagapakig-koordinar na ang Israel sa Department of Foreign Affairs (DFA), Department of Migrant Workers (DMW), kag sa iban pa nga mga ahensiya agud matumod ang luwas nga ruta para sa ila sini nga repatriation.
Ginsiguro man sang embahada nga ang mga napilasan nga mga Pilipino sa airstrikes ang makabaton sang medikal nga suporta kag kompensasyon. Padayon man ang aktibo nga komunikasyon sa tunga sang duha ka pungsod.
Samtang, temporaryo nga ginsirado ang Philippine Embassy sa Tel Aviv bangud sa pagpamahog sa seguridad apang bukas ang mga emergency hotlines para sa mga nagakinahanglan sang bulig.
