Arestado ang 17 ka persona matapos madakpan sa ginpatigayon nga operasyon sang kapulisan batok sa ilegal nga refilling kag rebranding sang liquefied petroleum gas ukon LPG sa Caloocan City.
Base sa impormasyon halin sa National Capital Region Police Office (NCRPO), nadakpan ang mga suspek sa sulod sang isa ka kompanya sa Sta. Quiteria Road kun sa diin ginpatigayon ang raid sang kapulisan nga may dala nga search warrant.
Sa amo nga operasyon, nakumpiskar sang mga otoridad ang nagkalain-lain nga kagamitan pareho sang equipment para sa refilling kag rebranding, mga bakante nga tangke sang LPG, pintura kag isa ka tanker.
Ginahayag sang NCRPO nga posible nga mapanabat ang mga nadakpan bangud sa paglapas sa Section 43 sang Republic Act 11592 ukon LPG Industry Regulation Act.
Suno pa sa kapulisan, delikado ang amo nga ilegal nga operasyon bangud mahimo ini magtuga sang sunog kag iban pa nga peligro kon wala nagaalinsunod sa safety standards sang gobyerno.
Samtang, wala naman naghatag sang pahayag ang representante sang kompanya nga gin-raid sang mga otoridad.
