ROXAS CITY – Nagapaayo na lamang sa ospital ang duha ka mga mangingisda nga nahilo sa ginkaon nga butete ukon puffer fish samtang nagapangisda sa lawod.
Ginkilala ang mga biktima nga sanday Raymundo Arinque 55-anyos sang Barangay Barra, Roxas City kag Rex Hontiveros 37-anyos sang Isla Gigantes, Carles, Iloilo.
Ba-se sa pahayag sang mga kaupdanan sang mga biktima, nakabunit sila sang butete kag ini ang ila ginluto ni Arinque, apang matapos sila nga magkaon nakabatyag sila sang pagsakit sang tiyan kag paglain sang pamatyag.
Gilayon nga nagtawag ang isa nila ka upod sa ila mga pamilya kag ginpahibalo nga mabalik na sila sa Libas Fishing Port para madala sa ospital ang duha.
Madasig naman nga nag-abot sa port ang Capiz Emergency Response team nga amo ang nagdala sa mga biktima sa ospital.
